ہے ہلالِ ماہِ رمضاں دیدنی خوش آمدید
روح کو ملتی ہے اس سے تازگی خوش آمدید
 
راس آئے ہر کسی کو رونمائی چاند کی
دیکھتے ہی شمعِ ایماں جل اٹھی خوش آمدید
 
فضلِ حق سے اہلِ دل کے کِھل اُٹھی دل کی کلی
چھا گئی یک گونہ سب پر بیخودی خوش آمدید
 
دور کردیتا ہے دل سے ماہِ رمضاں تیرگی
آتا ہے لے کر فروغِ زندگی خوش آمدید
 
عابد و معبود کا کرتا ہے رشتہ استوار
جوش پر ہوتا ہے اوجِ بندگی خوش آمدید
 
رہتا ہےبابِ اجابت ماہ بھر اس میں کُھلا
بخشتا ہے روح کو آسودگی خوش آمدید
******************************