حمد

قلب میں دھڑکن بن کے اترا نام ترا
سارے ناموں میں ہے پہلا نام ترا

ساگر ساگر بولیں موجیں یا اﷲ
ورد کرے ہیں دریا دریا نام ترا

رات اور دن پر تیرا نام مسلّط ہے
لے کر نکلے سورج چندا نام ترا

صبح ہوئی تو پھول پھول کے چہرے پر
شبنم کے قطروں میں چمکا نام ترا

بادل بادل سرد ہوا کے جھونکوں سے
قطرہ قطرہ بول کے برسا نام ترا

اڑتے اڑتے پنچھی ہر دم لیتے ہیں
وادی وادی صحرا صحرا نام ترا

کیڑوں کو دی تونے غذائیں پتھر میں
پتھر کے اندر بھی گونجا نام ترا

مستانے انداز میں پل پل یاد کرے
شجر  شجر  کا  پتّہ  پتّہ  نام  ترا

روشن لعل و گوہر تیرے نام سے ہے
لے کر چمکے پل پل مولا نام ترا

جگنو ، تتلی ، بھنورے ، تیرا ذکر کریں
ہر گل میں ہیں مہکا مہکا نام ترا

صدف کھلی تو پھیلا نور اندھیرے میں
طاہر نے بھی روشن پایا نام ترا

علیم طاہر

Mominpura, Survey No.19, H.No.51,
Maligaon, Nasic (M.S)
Mob: 9323177531 , 8976294034
Email: aleemtahir12@gmail.com
بشکریہ: مشتاق دربھنگوی
…………………