Avval-e-shab vo bazm kii raunaq shamaa bhii thii parvaanaa bhii
raat ke aaKhir hote hote Khatm thaa ye afsaanaa bhii

qaid ko tod ke nikalaa jab mai’n uthake baguule saath hue
dasht-e-adam tak jangal jangal bhaag chalaa viiraanaa bhii

haath se kis ne saaghar patkaa mausam kii bekaifii par
itnaa barsaa Toot ke baadal doob chalaa maikhaanaa bhii

Khuun hii kii shirkat vo kyo’n na ho shirkat chiiz hai jhagad kii
apano’n se vo dekh rahaa hoo’n jo na kare begaanaa bhii

ek lagii ke do hai’n asar aur dono’n hasb-e-maraatib hai’n
lau jo lagaaye shammaa khadii hai raqs me hai paravaanaa bhii