غزل

از ڈاکٹر جاوید جمیل

 

ہو پیار کی مدت میں طوالت  تو مزہ ہے

بر وقت ہو اظہار_ محبت تو مزہ ہے

مانا کہ مزاجوں میں ضروری ہے متانت

الفت میں ہو اک رنگ_ شرارت تو مزہ ہے

وہ روٹھ کے  بیٹھے رہیں کب دل کو گوارا 

مل جائے منانے کی اجازت تو مزہ ہے  

ہے جوش بھی اورہوش بھی اور سمت_سفر بھی 

ایسے میں کرم کر دے مشیت تو مزہ ہے
 
دنیا کی عطیات سے محظوظ ہوں بھرپور

لیکن رہے ایمان سلامت تو مزہ ہے

جاوید ابھی خلد_ بریں دور ہے بیحد

مل جائے زمیں پر کہیں جنت تو مزہ ہے
*****