Ye sabzah’mand-e-chaman hai jo lah’lahaa na sake,
wo gul hai zakhm-e-baharaaN jo muskuraa na sake,
ye aadmii hai vo parvaanah, samm-e-daanistaa,
jo raushnii meiN rahe, raushnii ko paa na sake,
ye hai khuloos-e-muhabbat ke haadisaat-e-jahaaN,
mujhe to kyaa, mere naqsh-e-qadam mitaa na sake,
na jaane aaKhir in aaNsuoN pe kyaa guzrii,
jo dil se aaNkh tak aaye, magar bahaa na sake,
kareiNge mar ke baqaa-e-dawaam kyaa haasil,
jo zindaa rah ke muqaam-e-hayaat paa na sake,
merii nazar ne shab-e-Gham unheiN bhi dekh liyaa,
wo beshumaar sitaare ke jagmagaa na sake,
ye mehr-o-maaH mere, hamsafar rahe barsoN
phir iske baad merii gardishoN ko paa  na sake
Ghate agar tau bas ek musht-e-Khaq hai insaan,
badhe to vus’at-e-kaunain meiN samaa na sake