غزل

آیا تھا ساتھ لے کے میں سوغاتِ خیر و شر
پیچھے لگی رہیں مگر آیاتِ خیر و شر
جھوٹی انا کے زعم میں گھر سے نکل پڑا
اے کاش بھول جائوں وہ لمحاتِ خیر و شر
ظالم کا سر بلند ہے مظلوم بے پناہ
مجبور دیکھتی ہیں یہ دفعاتِ خیر و شر
بچوں کو درس دینے کا نسخہ بدل گیا
دیتے ہیں مولوی نہ ہدایاتِ خیر و شر
حاکم سے اہلِ دیں نے بڑھایا ہے میل جول
سوزِ دروں سے خالی حکایاتِ خیر و شر
سمتوں کا کچھ خیال نہ اوقات ہی کا علم
اللہ رے جستجوئے مقاماتِ خیر و شر
منصور اپنی آنکھوں پہ آیا نہ اعتبار
آئے تھے مجھ کو دینے وہ خیراتِ خیر و شر

 ڈاکٹر)  منصور عمر)

Urdu Bazar, Neem Chauk
Darbhanga-846004
Mob: 9431085812
بشکریہ ’’میر بھی ہم بھی‘‘	مرتب: مشتاق دربھنگوی
………………………