تم جہاں تک چل چکے ہو راستہ کچھ اور ہے
میری اپنی زندگی کا دائرہ کچھ اور ہے

روز کچھ فرصت سے اپنے آپ کو پڑھتی ہوں میں
آپ کا کچھ اور میرا فلسفہ کچھ اور ہے

لوگ کیا سمجھیں مری ہنستی ہوئی آنکھوں کا غم
انکا قصہ اور میرا واقعہ کچھ اور ہے

آج کی شب ٹوٹنے والا ہے آندھی کا بھرم
میری شمعِ زندگی کا حوصلہ کچھ اور ہے

شہرتیں تو اور بھی راہوں سے مل جاتیں مجھے
شاعری میں زندگی کا تجربہ کچھ اور ہے

کون میرے آئینے کو اپنی آنکھیں دے گیا
میرا چہرہ تو وہی ہے آئینہ کچھ اور ہے

لذّتِ احساس میری اور بھی بڑھتی گئی
شعر کہنے کے عمل کا ذائقہ کچھ اور ہے

کون  ِبچھڑا ہے میں جس کی جستجو میں کھو گئی
گفتگو کچھ کر رہی ہوں حافظہ کچھ اور ہے

ہر گھڑی اُس کا تصور ، ہر گھڑی اُس کا خیال
عشق کی دنیا کا نغمہؔ فلسفہ کچھ اور ہے
****************