حمد

میرے اللہ مری فکر عنایت تیری
میری ہر سانس ، مری ذات امانت تیری

لوگ مٹی کا کھلونا تو بنا سکتے ہیں
خاک کو روح عطا کرنا ہے قدرت تیری

میں ترے نام کی تعویذ لئے پھرتی ہوں
مجھ کو محفوظ رکھا کرتی ہے قربت تیری

دل ترے نام کی خوشبو میں بسا رہتا ہے
میرے ایمان کا حاصل ہے عبادت تیری

میں بھلا طور پہ موسیٰؑ کی طرح کیوں جائوں
ذرّے ذرّے سے نمایاں ہے حقیقت تیری

ڈوب کر تیرے تصور میں تری یادوں میں
عمر بھر کرتی رہوں گی میں اطاعت تیری

نور ہی نور ترا دیکھتی ہے نغمہ نور
کثرتِ حسن میں یک رنگئی وحدت تیری

نـغـمـہ نـور

3A/1, Kushtia Masjid Bari Lane,
3rd floor, Kolkata- 700039
Mob: 9007869335
Email: naghmanoor786@gmail.com
بشکریہ ’’غزالانِ حرم‘‘ مرتب: مشتاق دربھنگوی
……………………………………