یہ غم نہیں ہے کہ وہ مجھ پہ مہربان نہیں
یہی بہت ہے کہ وہ مجھ سے بدگمان نہیں

ہر ایک ہاتھ میں پتھر ہے دوسروں کے لئے
بنایا کس نے مگر کانچ کا مکان نہیں

زمین جتنی بھی اونچائیوں کو چھو لے گی
اُسے پہاڑ تو کہہ لیں گے ، آسمان نہیں

جسے بھی پیاس لگے کھود لے کنواں خود ہی
ہمارے شہر میں اب کوئی میزبان نہیں

کرونگی بات میں اپنی زبانِ اردو میں
مری زبان سے میٹھی کوئی زبان نہیں

عدو کو اُس کی ہی چوکھٹ پہ زیر کرتے ہیں
بلا کے در پہ جھکانا ہماری شان نہیں

میں چند لمحوں میں تم کو سنا نہیں سکتی
کہ مختصر تو مرے غم کی داستان نہیں

میں کیوں نہ توڑ دوں نغمہؔ یہ مہرِخاموشی
یہاں تو گود کا بچہ بھی بے زبان نہیں
**************************