کسی کی چارہ گری سے میں مستفید نہ تھی
مسیحِ وقت کی تشخیص پُر امید نہ تھی

کتابِ دل کی ہر اک سطر تیرے نام لکھی
یہ اور بات ترے واسطے مفید نہ تھی

عجب ہے کیا جو خدا نے عطا کی مجھ کو بہشت 
کہ اس کے فضل سے میری خطا مزید نہ تھی

ترا خیال بمثلِ ہلالِ عید ابھرا
کہ تیری دید سے پہلے تو عید ، عید نہ تھی

تمہارا عشق بہ اندازِ عشق تھا لیکن
تمہاری چاہ ہماری طرح شدید نہ تھی

مرے رقیب کے تم پاسبان بننے لگے
مرے حبیب! مجھے تم سے یہ امید نہ تھی

نہ کیسے اشک جھلک اٹھتا میری آنکھوں میں
کہ درد و غم سے مری زندگی بعید نہ تھی

ہر ایک شعر روایت شناس تھا نغمہؔ
جدید رنگ تھا لیکن غزل جدید نہ تھی
****************************