* زندگی اب نہ سنا غم کی کہانی مجھ کو *
زندگی اب نہ سنا غم کی کہانی مجھ کو
غرق کردے نہ کہیں آنکھ کا پانی مجھ کو
کیسے گردن نہ جھکاتی میں بھری محفل میں
تیری تلوار کی عزت تھی بچانی مجھ کو
تجھ کو ہی حفظ کیا شام و سحر اس دل نے
تیری ہر بات رہی یاد زبانی مجھ کو
رات جب نیند نہ آئی تو مرے گھر آکر
چندا ماما نے سنائی تھی کہانی مجھ کو
دشت و دریا کی طرح پھیلے مسائل میرے
اور موجوں سی ملی غم میں روانی مجھ کو
میری بے خواب نگاہوں کو نظارا تو ملے
اپنی تصویر ہی اک دیدو نشانی مجھ کو
ایک ہی بار کہا میں نے اسے سرخ گلاب
اس نے سو بار کہا رات کی رانی مجھ کو
منتظر ہوں اُسی آواز کی اب تک نغمہؔ
شبِ ہجراں میں سنائے جو کہانی مجھ کو
************************ |