* رات بھر چاندنی کے سفر میں رہی *
رات بھر چاندنی کے سفر میں رہی
میں شریکِ سفر کی نظر میں رہی
روبرو وہ رہا آئینے کی طرح
میں نظر کے طلسمی اثر میں رہی
ٹوٹ جاتا نہ کیوں خواہشوں کا بدن
زندگی ، زندگی بھر کھنڈر میں رہی
دھوپ غم کی ، خوشی کے تعاقب میں تھی
جسم گھر میں تھا ، میں رہ گزر میں رہی
مجھ سے ناآشنا میرے دیوار و در
اجنبی بن کے میں اپنے گھر میں رہی
شفقتیں اُن دنوں اُس پہ روشن ہوئیں
جن دنوں نغمہؔ ممتا کے گھر میں رہی
*********************** |