جو بنا گئے تماشہ ، اُنہی بندھنوں سے پوچھو
مری داستان یا تو مری دھڑکنوں سے پوچھو

ملی آنسوئوں میں لذت ، ملا لطف دردِ دل میں
شبِ غم میں کیا مزہ ہے مری الجھنوں سے پوچھو

مری قدر و منزلت سے نہیں دوست میرے واقف
مرے سر کا مول کیا ہے مرے دشمنوں سے پوچھو

جو بلک رہے ہیں بچے جو سسک رہی ہیں مائیں
ہے جو کربِ تنگدستی تہی دامنوں سے پوچھو

مرے گھر کی مفلسی کا ہے عجیب ہی نظارہ
کہ ہے  بھوک پیاس کیسی مرے برتنوں سے پوچھو

میں کسے بتائوں نغمہؔ کہ ہے دل میں کرب کیسا
غمِ زیست کا فسانہ پھٹے دامنوں سے پوچھو
*********************