* Ajeeb sa tanaao hai..... *
Ajeeb sa tanaao hai.....
Koi andekha,anjaana sa khauf musallat hai
Ghar ka har far'd,jo bazaahir ek rishtey se juRa hua hai
Dar as'l boseeda makaan ki ei'nto'n ki tarah
Lamha lamha andar hi andar naa mahsoos tareeqe se
Khisakta jaa raha hai
Makaan ki chat kabhi bhi zameen bos ho sakti hai
Roshandaan se ta'ngi huyee
Mai apni chatree utaarna chaahta hoo'n
Magar mere haath wahaa'n tak nahi pahun'ch paate.....
Tamaam rishtey
Barsaat me bheegi huyee
Kaai zadah deewaar ho'n jaise
Eitmaad ki nar'm hatheliyaa'n phisal phisal jaati hai'n.
****************
|