Jab zulf teri mujh pe bikharti nazar aaye
Bigrhi huee taqdeer sanwarti nazar aaye
Haule se saba jab bhi guzarti nazar aaye
Tasvweer teri dil me’n utarti nazar aaye
Yeh manzil-e- ulfat to nahi’n ahde guzashta
Ik yaad thee dil me’n jo bisarti nazar aaye
Ho’nto’n ki ha’nsi tazgi-e-zakham hai yaaro
Dil me’n yeh chhuri ban ke utarti nazar aaye
Malboose-maseeha me’n chhupe baithe hai’n katil
Ab zeest na kiyo’n inse bhi darti nazar aaye
Bakhshi hai “Kanwal” mai’n ne zeest ko shohrat
Mai’n hoo’n ki ha’nsi lab pe saw’narti nazar aaye