Tujh ko pata hai pyaas ki shiddat kise mili
Ai mauj-e-aab teri halaawat kise mili.......!
Ham se uRa ke shauq-e-safar kaun le gaya
Be-naam mausamo'n ki rifaaqat kise mili...!
Kis ke labo'n ko naghma-e-sheerii'n dahan mila
Us jism-e-bepanaah ki qurbat kise mili.......!
Ham koshisho'n ke baad tahi-dast hi rahe....
Ab ke junu'n me'n dard ki daulat kise mili....!
Yu'n to safar me'n peR kayi sayaadaar the...
Kuchh der baith paaye'n ye fursat kise mili...!
Manzil nahi'n mili to koyi gham nahi'n 'Shamim'
Ye raah-e-shauq , itni masaafat kise mili......!