کیا کہئے مفہوم جنوں سے ہیں کتنے بیگانے لوگ
دیوانے کو ہوش کی باتیں آتے ہیں سمجھانے لوگ
آجاتے ہیں بہر تواضع دو اک پتھر گلیوں سے
مِل جاتے ہیں ہر بستی میں کچھ جانے پہچانے لوگ
جلتی سانسیں، تپتے چہرے، ساکت ہونٹ، سلگتے دل
اُس محفل میں چپ رہ کر بھی کہتے ہیں افسانے لوگ
ذکر ِ سرِ شوریدہ چھیڑو دشتِ جنوں کی بات کرو
شہر کی رسمیں ہم کیا جانیں ہم تو ہیں دیوانے لوگ
کوئی ہے واعظ، کوئی ہے ناصح، دوست کوئی غمخوار کوئی
کیسے کیسے بھیس بدل کر آتے ہیں سمجھانے لوگ
کتنے سادہ، کتنے رنگیں، کتنے پیارے لگتے ہیں
روٹھے روٹھے ، برہم برہم بیگانے بیگانے لوگ
ماہر فن جو نکلے اُن کو عظمت فن کا تاج ملا
ہم تو اک فنکار تھے شاعر ہم کو کب پہچانے لوگ
****************************