غزل

تابِ دیدار جو لائے مجھے وہ دل دینا
منہ قیامت میں دکھا سکنے کے قابل دینا
پائوں یارب مجھے تاجِ سرِ منزل دینا
ہاتھ بھی گردنِ مقصد میں حمائل دینا
غیرِ حاضر نہ مظاہر کی حقیقت سمجھوں
اتنی تمیز میانِ حق و باطل دینا
ذوق میں صورتِ موج آکے فنا ہو جائوں
کوئی بوسہ تو بھلا اے لبِ ساحل دینا
رشکِ خورشیدِجہاں تاب دیا دل مجھ کو
کوئی دلبر بھی اسی دل کے مقابل دینا
اصلِ فتنہ ہے قیامت میں بہارِ فردوس
جز ترے کچھ بھی نہ چاہے مجھے وہ دل دینا
تیرے دیوانے کو بے حال ہی رہنا اچھا
حال دینا ہو اگر رحم کے قابل دینا
ہائے رے ہائے تری عقدہ کشائی کے مزے
تو ہی کھولے جسے وہ عقدۂ مشکل دینا
خوں فشانی ہو مری آئینہ رو ئے فنا
دونوں آنکھوں کو رگِ گردنِ بسمل دینا
ناتوانوں کے سہارے کو ہے یہ بھی کافی
دامنِ لطفِ غبار پسِ محمل دینا
سرِ دشمن سے کہیں آگ بھڑکتی نہ دیکھی
شمع ساں مجھ کو سر افرازی محفل دینا
تہمت دل دہی غیر ہوس کیش غلط
آپ معشوق ہیں کیا جانیں بھلا دل دینا
نقدِ جان و دل اِدھر دولتِ دیدار اُدھر
اُن کو لینا بہت آسان ہے ، مشکل دینا
رہ کے آغوش میں اے بحرِ کرم عاشق کو
قسمت سوختۂ سبزۂ ساحل دینا
تنگی غنچہ پژمردہ ہو صحرائے وسیع
اس قدر کلفت افسردگی دل دینا
درد کا کوئی محل ہی نہیں جب دل کے سوا
مجھ کو ہر عضو کے بدلے ہمہ تن دل دینا
وعدہ کرنے سے بھی تنگیِ دہن نے روکا
بوسہ کیسا کہ زبان اُن کو ہے مشکل دینا
٭٭٭