غزل

آہ بھی آج ہے اک ہم سفرِ اشک نئی
کیا ملی سوئے فلک رہ گزرِ اشک نئی
نور افشاں ہے دم گیریہ کسی کا تو خیال
نظر آتی ہے ضیائے گہر اشک نئی
گوہر گوش قبول اس نے بنایا آخر
ہافت غیب نے دی یہ خبر اشک نئی
آج تو گریہ عاشق نے کئے دل ٹکڑے
ہاتھ آئی کوئی تیغِ اثر اشک نئی
کوشش دست مژہ نے اسے کب روکا تھا
آج ہے طرز گرفت ِ کمر اشک نئی
میلِ پرواز سوئے اوجِ فلک رسمِ کہن
ہمت طائر بے بال و پر اشک نئی
توڑ اس میں بھی ہوا تیرِ دعاء کا آخر
اب تو اے چرخِ کہن اک سپرِ اشک نئی
تیرے آنسو بھی ہوئے خشک، میں خوننا بہ فشاں
شاید اے شمع ہے میری سحرِ اشک نئی
سیل و طوفاں جو کہا تونے تو کیا خاک کہا
کچھ نئی بات ہو اے مدحِ گر اشک نئی
رشکِ فوارہ ہے بے تابی جوشِ رقت
اے جنوں ہے یہ بہارِ شجراشک نئی
تیرے پرتو سے ہے جب رشکِ قمر ہر قطرہ
ٹھیک ہے بندشِ نور قمر اشک نئی
رات دن مجھ کو تو کرتی ہی رہی تر دامن
اُن کے دامن کی طرف ہے نظر اشک نئی
ثمرِ اشک غم عشق تو تھا تیرا رحم
جھڑکیاں دیتی ہیں بوئے ثمر اشک نئی
محوِ عشق دُرِ دنداں کی علامت کیا ہے
رونے میں ہوتی ہے تاب گہر اشک نہیں
بارہا معرکے قلزم سے ہوئے فتح کے ساتھ
آج پھر جنگ ہو، پھر ہو ظفرِ اشک نئی
نہ کسی راہ سے پہنچا وہ کسی دامن تک
کوئی راہ آج ہو اے راہ برِ اشک نئی
برق ِ ہستی ہے پئے غیر سر شکِ آسیؔ
کچھ تو بات اس میں ہے اے بے خبرِ اشک نئی

٭٭٭