غزل

عہدِ شباب عہدِ وفائے نگار ہے
کتنا ہی پائیدار ہو نا پائیدار ہے
کیوں تجھ کو اس قدر غم روز شمار ہے
اے محتسب شراب بڑی غم گسار ہے
جنت نہیں ہے پر توروئے نگار ہے
طوبیٰ نہ کہئے سایہ بالائے یار ہے
صیاد و عندلیب میں کیا واقعہ ہوا
گل دلفگار، سنبل تر سوگوار ہے
فانی ہے گردشِ فلکی بھی ہمارے ساتھ
ساری ہمیں سے دشمنی روز گار ہے
خوں ریز توبہ زہد شکن اتقاء گداز
شام آپ کے شباب کی صبح بہار ہے
ایذا نویدِ مقدم راحت ہے صبر کر
جوشِ بہار گل کشش نوک خار ہے
کیا چیز تیری نذر کریں اے رسولِ یار
اپنی تو زندگی بھی یہاں مستعار ہے
جوشِ سر شک اور ہوا کوئے زلف کی
ایک ایک قطرہ نافۂ مشک تتار ہے
عشق و ہوس میں حسن کو تمیز چاہئے
مانو نہ مانو آگے تمہیں اختیار ہے
ذرہ بھی روشنی نہیں نرگس کی آنکھ میں
یہ بھی مگر ستم زدۂ انتظار ہے
ہستی ہے عین موجۂ دریائے نیستی
درکار قوتِ نگہِ اعتبار ہے
وقتِ اخیر اگر نہ بندھا غیر کا خیال
کنجِ لحد ہمیں چمن ِ کوئے یار ہے
بنیادِ روز گار کی نا محکمی نہ پوچھ
گنبد حباب کا تو بہت استوارہے
سودائے ذوق جلوہ عبث جب نظر نہیں
جلوہ تو بہر اہلِ نظر بے قرار ہے
واعظ مرا معاملہ میرے خدا کو سونپ
بندہ گناہ گار ، وہ آمرز گار ہے
یہ بات وہ ہے جس کو مرے دل سے پوچھلے
عشق مژہ میں بھی خلش نوک خارہے
ذوقِ ادا و ناز کہاں بے خودی کہاں
اب تو شرابِ وصل بھی کچھ ناگوار ہے
بہرِ زیارت آئے ترا تیر کیوں نہ ہو
حسرت شہیدِ یاس، دل اُس کا مزار ہے
لو اب تو مرغِ جاں نہیں ممکن کہ اڑسکے۸
تیرِ نگاہ ناز کلیجے کے پار ہے
کثرت میں اور کیا ہے جو وحدت نہ مانئے
ہر ایک ایک ایک ہے، سویا ہزار ہے
پیری میں حرصِ شاہد دمے ہو گئی جوان
اپنی خزاں بھی موسمِ جوِ بہار ہے
مستی میں کوئی راز جو آسی سے فاش ہو
معذور ہے ابھی کہ نیا بادہ خوار ہے

٭٭٭