غزل

جز ہم زباں نہ کوئی ملا قدر داں مجھے
آنکھیں کسی کی کہتی ہیں جادو بیاں مجھے
کرنا ہے بزم شعر میں وصفِ دہاں مجھے
دم بھر کو آج کردے خدا غیب داں مجھے
لائی عدم میں کشتی عمر رواں مجھے
پہنچا دیا ہے بیٹھے بیٹھائے کہاں مجھے
آغوش میں بھی چاند سی صورت ضرور ہے
رفعت اگر ملی صفتِ آسماں مجھے
بلبل نہیں میں طائرِ نکہت ہوں اے نسیم
ہے ایک غنچہ ساں قفس و آشیاں مجھے
گل ہائے نقشِپا کی طرح باغ ِ دہر میں
جو چل گئی ہوا، ہوئی بادِ خزاں مجھے
جائے سخن زبان سے شعلہ بلند ہے
محفل میں ایک شمع ملی ہم زباں مجھے
سنتا ہوں یار کے لبِ چاہ ذقن سے میں
یوسف نہ گر پڑیں تو نہ کہنا کنواں مجھے
اے مشتِ خاک چل دئیے ہوش و حواس و صبر
لازم ہے سمجھیں گردِ پس کارواں مجھے
اے نقش پا ہدایت راہِ فتادگی
تلقین نالہ اے جرسِ کارواں مجھے
صدموں نے ہجر کے مجھے بے کیف و کم کیا
کیوں وصل میں قید زمان و مکاں مجھے
دل کیا کہ جان میں ہے جگہ تیری اے پری
قد سہی ہوا الفِ لفظِ جاں مجھے
پارے کی طرح شعلہ غم لے کے اڑ گیا
ڈھونڈو گے بھی تو پائو گے اب تم کہاں مجھے
صبر و قرار ہوش و خرو، کس کو روئیے
پامال کر رہا ہے غمِ رفتگاں مجھے
سینے میں دل اگر نہ ہلے حرصِ نالہ کیوں
کیا بات کہہ گیا جرسِ کارواں مجھے
حق پوچھئے تو بات تھی انصاف کی یہی
نامِ عدو لیا تو کہا بد زباں مجھے
باغِ جہاں میں طائر رنگ پریدہ ہوں
خوفِ قفس ہے کچھ نہ غم آشیاں مجھے
گزر ا میں اپنی جان سے کس کا بُرا کیا
کیوں خاک میں ملاتے ہیں اہلِ جہاں مجھے
ملتا ہوں دم میں راہ و انِ عدم سے میں
بانگِ جرس ہے ہر نفس کارواں مجھے
کیوں کر کہوں کہ چار نگاہیں عدو سے کیں
آدھی نگاہ نے تو کیا نیم جاں مجھے
گزرا جدھر سے جوشِ جنوں میں ہدف بنا
پیر و جوانِ خلق ہیں تیرو کماں مجھے
لائی عدم سے لے بھی چلی جانبِ عدم
کیسی رفیقِ راہ ہے عمرِ رواں مجھے
اس قافلے میں ہوں جرسِ کارواں کی طرح
کرتا ہے سینہ کوبِ غم ہم رہاں مجھے
خارِ سرِ حریم چمن ہوں میں ناتواں
گلچیں سے ڈر ہے کچھ نہ باغباں مجھے
وہ آہ کرکہ پھونک دے دونوں جہان کو
بھڑکا رہا ہے شعلہ سوزِ نہاں مجھے
جاتا تو ہوں عیادتِ چشم علیل کو
پٹکیں گی خاک پر نگہِ ناتواں مجھے
اغیار پر نگاہِ کرم میرے سامنے
کیا تیر مارتا ہے وہ ابرو کماں مجھے
آسی شہیدِ عشق ہوں مردہ نہ جانیو
مر کر ملی ہے زندگی جاوداں مجھے
٭٭٭