شہید ہوں چشم نرگسیں کا ،نیازمند اپنے نازنیں کا
مزارہے لب ہائے شکریں کا،ہے نام بس قندو انگبیں کا
نہ وصف پوچھو رخِ حسیں کا، نہ زلفِ پُرپیچ وتاب وچیں کا
یہ نورہے روئے مہ جبیں کا،کہ ہوخجل چاند چودہویں کا
جوحلقہ ہے زلفِ عنبریں کا، سو ایک نافہ ہے مشکِ چیں کا
٭٭٭
نہ بات میں کیوں ہوشانِ شیریں، بنی ہے مصری لسانِ شیریں
لکھوں جو وصفِ لبانِ شیریں، قلم کے صدقے ہوجانِ شیریں
نہ کیسے میرا بیانِ شیریں ،ہوجوئے شہدِروانِ شیریں
بدن میں جب تک ہے جانِ شریں ،مزادہن میں ہے انگبیں کا
٭٭٭
چراغِ خور اس کے چہرہ سے گل ،کمررگِ گل ہے بے تامل
زمین کو چال سے تزلزل، فلک کو پہو نچا ہے گھنگر وکاغل
وہ رائے خنداں ہے جانِ بلبل، قدرِ خرا ماں ہے سروِ صلصل
وہ چشمِ فتاںہے غیرتِ مُل ،وہ زلفِ پیچاں ہے رشکِ سنبل
عذار میں ہے صباحتِ گل ، بدن میںعالم ہے یاسمیں کا
٭٭٭
فراق نے شمعِ مجلسِ غم، جلارُ لاکر کیاہے ہردم
ہوخاک جل کر تمام عالم،جو سوزِدل سے بھریں کوئی دم
اٹھائیں دامن جو آنکھ سے ہم،حباب کو ہو فلک میں عالم
یہ جوش پریاں ہے اشک کایم، کہ ساتوں دریا ہیں قطرہ سے کم
جسے کہ کہتے ہیں سب جہنم ،شررہے اک آہِ آتشیں کا
٭٭٭

ہے سنبل ِموئے زلفِ حوراں، جگر میں جو جو ہے دودِ پیچاں
ہے نہرِتسنیم چشمِ گریاں ، تور شکِ طوبیٰ ہے نخلِ حرماں
جسد کے گل ہائے زخمِ خنداں ،نہ کس طرح ہونصیب ِ بُستاں
زبسکہ ہے جوشِ داغ ہجراں ، ہوا مرا سینہ باغِ رضواں
برائے گل گشت جائے غلما، خیال پھر تا ہے اک حسیں کا
٭٭٭
شیوالے پر قصد ہے ڈھئی کا، بتوں سے اب دم ہے بندگی کا
ہواہے اسلام جی سے پھیکا، مزا پڑا دل کو کا فری کا
ہے تارِسبحہ وبال جی کا، جنیو رشتہ ہے زندگی کا
بُرا ہو بدبخت عاشقی کا، نہ دیں ہو بربادیوں کسی کا
بنا ہے عشقِ بتاں میں ٹیکا، نشانِ سجدہ مری جبیں کا
٭٭٭
نہیں ہے زخمِ سنان وخنجر ،کرے ہیں یہ آگ کے مقرر
بھرے ہیں کیا کیا شرار واخگر ،بجائے او ساخ ان کے اندر
نہ ہو تو شر مندہ پھا ہے رکھ کر، مجھے تو جراح ہے یہی ڈر
اگر ہو پھاہا پر سمندر، توخاک ہوایک دم میں جل کر
سنا جو ہو آفتابِ محشر، کھرنڈ ہے داغِ آتشیں کا
٭٭٭
ہے فوق مصرع کو کہکشاں سے، تو حرف ہیں سنبل ِ جناں سے
نہ کیوں لڑے بیت لامکاں سے، عیاں ہے شانِ خدا یہاں سے
نہ پوچھو آسیؔ بے نشاں سے، کہاں کو پہنچی غزل کہاں سے
طمع ہے انصافِ دوستاں سے، کہ اتنا فرمائیں سب زباں سے
کیا ہے ناسخؔ نے آسماں سے ،بلند تررتبہ اس زمیں کا
٭٭٭