سلام
اے جان جاناں میں فدا
اے نرِ رحماں میں فدا
سلطان میرے میں فدا
ایمان میرے میں فدا
اے صبح پنہاں میں فدا
اے سرِّ سبحان میں فدا
مہمان میرے میں فدا
اے جان میرے میں فدا
اے میرے سرور میں فدا
میرے پیمبر میں فدا
اے مرے آقا السلام
امت کے شید االسلام
میرے مسیحا السلام
نورِ سویدا السلام
اے میرے مولاالسلام
رحمت کے دریا السلام
میرے دل آراالسلام
جانِ تمناالسلام
اے مرے سرور میں فدا
میرے پیمبر میں فدا
پیدا ہوئے پیدا ہوئے
نورِ خدا پیدا ہوئے
بحرِ سخا پیدا ہوئے
دُرِّ صفا پیدا ہوئے
خیر الوریٰ پیدا ہوئے
دل کی دوا پیدا ہوئے
ابرِ عطا پیدا ہوئے
موجِ وفا پیدا ہوئے
اے میرے سرور میں فدا
میرے پیمبر میں فدا
شمس الضحیٰ پیدا ہوئے
نورالہدیٰ پیدا ہوئے
کہف الوریٰ پیدا ہوئے
کیا مہ لقا پیدا ہوئے
بدرالدجیٰ پیدا ہوئے
نجم ضیا پیدا ہوئے
صدر العُلیٰ پیدا ہوئے
کیا مہ لقا پیدا ہوئے
اے میرے سرور میں فدا
میرے پیمبر میں فدا
شاہِ شہاں پیدا ہوئے
گنجِ نہاں پیدا ہوئے
گردوں مکاں پیدا ہوئے
مطلوبِ جاں پیدا ہوئے
جانِ جہاں پیدا ہوئے
تاجِ جہاں پیدا ہوئے
عالی نشاں پیدا ہوئے
کیا دلستاں پیدا ہوئے
اے میرے سرور میں فد
میرے پیمبر میں فدا
شاہِ زمیں پیدا ہوئے
صاحب نگیں پیدا ہوئے
مہرِ مُبیں پیدا ہوئے
کیا مہ جبیں پیدا ہوئے
سردار دیں پیدا ہوئے
مسند نشیں پیدا ہوئے
نورِ یقیں پیدا ہوئے
کیا نازنیں پیدا ہوئے
اے میرے سرور میں فدا
میرے پیمبر میں فدا
شاہِ عرب پیدا ہوئے
عالی نسب پیدا ہوئے
جانِ طلب پیدا ہوئے
اُمیّ لقب پیدا ہوئے
ماہِ طرب پیدا ہوئے
والا حسب پیدا ہوئے
کانِ ادب پیدا ہوئے
محبوب رب پیدا ہوئے
اے میرے سرور میں فدا
میرے پیمبر میں فدا
خیر البشر پیدا ہوئے
تیغِ ظفر پیدا ہوئے
رشکِ قمر پیدا ہوئے
معجز نظر پیدا ہوئے
نیکو سیر پیدا ہوئے
غم کے سپر پیدا ہوئے
روشن گہر پیدا ہوئے
نازک کمر پیدا ہوئے
اے میرے سرور میں فدا
میرے پیمبر میں فدا
کیا نور انسان ہے
اللہ تیری شان ہے
سب جسم ہے یہ جان ہے
چہرہ نہیں قرآن ہے
یہ دین ہے ایمان ہے
میرا یہی سلطان ہے
جو ہے یہاں حیران ہے
جی جان سب قربان ہے
اے میرے سرورِ میں فدا
میرے پیمبر میں فدا
ہیں سُرمگیں آنکھیں غضب
اعجاز سے توام ہے لب
گیسو میں تاریکی شب
رخسار میں انوارِ رب
پلکوں میں ، ہیں تیروں کے ڈھب
چتون نہیں جادو ہے سب
ابرو مہِ عیدِ طرب
ایسا کوئی ہوتا ہے کب
اے میرے سرورِ میں فدا
میرے پیمبر میں فدا
کیا نرگسِ بیمار ہے
کیا ابروئے خم دار ہے
کیا طرہ طرار ہے
کیا چاند سا رخسار ہے
کیا نور کیا دیدار ہے
یوسف یہاں بے کار ہے
تسخیر جان زار ہے
جو ہے سو دل افگار ہے
اے میرے سرورِ میں فدا
میرے پیمبر میں فدا
کیوں کر انہیں کہئے بشر
نورِ خدا ہے جلوہ گر
ہوں گے یہ وہ رشکِ قمر
شق چاند کا ہوگا جگر
اشجار دوڑیں حکم پر
تسبیح پڑھ دیں گے حجر
گزریں گے آسیؔ یہ جدھر
بس جائے گی وہ رہ گزار
اے میرے سرورِ میں فدا
میرے پیمبر میں فدا
٭٭٭
