قطعات صفحہ نمبر۸

ذرے سے جو دیکھنے میں کم ترہوں گے
تیرے لیے وہ بھی مہرانور ہوں گے
اے دل نہ برابری کسی کی کرنا
ہاں خاک کے اک روز برابر ہوں گے
٭٭٭
اک روز کہا میں نے کہ تو دل برہے
جان عاشق لب شکر پر ورہے
کس ناز سے بولے منہ کو منہ پر رکھ کر
اب یہ کہئے کہ جان ہونٹوں پر ہے
٭٭٭
ہاں نقشِ مراد بے بٹھائے نہ رہوں
ہاں لذتِ وصل بے اٹھائے نہ رہوں
راتوں کو نیندبن کے آئوں توسہی
دربند ہوں پر بغیر ائے نہ رہوں
٭٭٭
روٹھے ہو تو میں بھی بے منائے رہوں
بس میں اپنے بغیر لائے نہ رہوں
اپنا کینہ عدو کی الفت بن کر
دل میں ترے یار بے سمائے نہ رہوں
٭٭٭
فُرقت میں بغیر زہر کھائے نہ رہوں
جس طرح ہوجان بے کھپائے نہ رہوں
قدموں سے چھڑائو تم تو مہندی کی طرح
بے کوئی نہ کوئی رنگ لائے نہ رہوں
٭٭٭
کرتا رہوں میں یوں توفغان وزاری
اس بت کے نہ دل میں رحم ہویا باری
پتھر سہی دل مگر پسیجے نہیں کیوں
پتھر سے تو ہو جاتے ہیں دریا جاری
٭٭٭
دل سرد ہے خاک گرم جوشی ہوگی
مے خوار رہے نہ مے فروشی ہوگی
امید شرابِ ناب کیسی آسیؔ
دورِ آخر ہے دُرد نوشی ہوگی
٭٭٭
غنچے تھے میری دل فگاری کی قسم
شبنم تجھے میری اشک باری کی قسم
کس گل کی نسیمِ صبح خوشبو لائی
بے تاب ہے دل جنابِ باری کی قسم
٭٭٭
باز آئودمِ عشق کے اب بھر نے سے
آسیؔ ڈرتے نہیں ہوتم مر نے سے
مجنوں کے لبِ گور سے آتی ہے صدا
مرنا بہتر ہے عاشقی کرنے سے
***