قطعات صفحہ نمبر۳

صحرا کی خبر لیں مست سودا کی طرح
کیوں گوشہ نشیں ہوں مئے مینا کی طرح
کیوں صورتِ خم گاڑ کے رہ جائے پائوں
گردش میں مزا ہے جامِ صہبا کی طرح
٭٭٭
سران کے چڑھیں گل رعنا کی طرح
چومیں گے قدم نقش کف پا کی طرح
ٹکرائیں گے سرساحل مقصود سے ہم
گو بے سرو پا ہیں موجِ دریا کی طرح
٭٭٭
پستی ہی سے ہے بلند بینی میری
ہے سیرِ ارم گوشہ نشینی میری
اٹھ کے فنا ہوں نقشِ پا کے مانند
ہستی ہے میری خاک نشینی میری
٭٭٭
کیا جانے کوئی کیا ہے دلِ قاتل میں
بہتر ہے کہ دل کی بات رکھئے دل میں
سر صورتِ شمع بارِ گردن کیوں ہے
آسیؔ نہ زبان کھول اس محفل میں
٭٭٭
یا مجھ کو ترا حُسن نہ بھایا ہوتا
یا ہر رگ و پے میں تو سمایا ہوتا
یا دل ہی میں جلوہ اگر ہونا تھا
ہر جزو بدن کو دل بنایا ہوتا
٭٭٭
عاشق کی قدر کچھ نہ جانی افسوس
افسوس افسوس ہائے جانی افسوس
اب آنکھوں میں جان آکے اٹکی ہے یہاں
پر تیری وہی ہے لن ترانی افسوس
٭٭٭
کیوں ہم سے جلا نالۂ جانکاہ ہیں ہم
یا تیر کسی رقیب کی آہ ہیں ہم
کہتا تو ہے تو بھی جان اپنی ان کو
دشمن تیری جان کے ہوا خواہ ہیں ہم
٭٭٭
ہر چند کہ موت کا طلب گار ہوں میں
رنج و الم و غم سے گراں بار ہوں میں
پر زندگی اپنی کہہ چکا ہوں تجھ کو
کس منہ سے کہوں زیست سے بیزار ہوں میں
***