Ae junuu.n phir mire sar par vahii shaamat aa.ii
Phir pha.nsaa zulfo.n me.n dil phir vahii aafat aa.ii
Mar ke bhii jazb-e-dil qais me.n taasiir ye thii
KHaak U.Daatii hu.ii lailaa sar-e-turbat aa.ii
Masjide.n shahr kii ai piir-e-muGhaa.n khaalii hai.n
Mai-kade me.n to jamaa.at kii jamaa.at aa.ii
Vo hai khi.Dkii me.n udhar bhii.D nazar-baazo.n kii
Aaj us kuuche me.n sunte hai.n qayaamat aa.ii
Kabhii jii bhar ke vatan me.n na rahe ham aasii
Roz-e-miilaad se taqdiir me.n Gurbat aa.ii
******************