غزل

کہا یہ دیکھ کر خالِ بت بے پیر کا دانا

الٰہی اس کو تو کرنا میری تقدیر کا دانا
نہیں رہتا ہے بے پہنچے ہوئے تقدیر کا دانا
لبِ سوفار تک پہنچا دل نخچیر کا دانا
جو دانا ہے تو دیوانوں کے قدموں سے تو لپٹا رہ
مسلسل یہ صدا دیتا ہے ہر زنجیر کا دانا
حقیقت دار کے اوصاف کیا ہوں بے حقیقت میں
کہاں ہے قابلِ نشو و نماتصویر کا دانا
بھلا ہم چشم ہو سکتا ہے موتی روزنِ دل سے
یہ ہے چھیدا ہوا اُن کی نظر کے تیر کا دانا
بسانِ آسیا پائے تو کل کو نہ لغزش دے
کہ منہ میں آرہے گا خود بخود تقدیر کا دانا
جو آیا منہ تک اُڑ بھاگا ہوائے شعلہ غم سے
سپندِ آتشِ دل ہے میری تقدیر کا دانا
دل پُر نور محوِ یاد اَبرو پر یہ پھبتی ہے
کہ ہے دھویا ہوا آبِ دمِ شمشیر کا دانا
ستارے کی چمک دیکھی نہ تھی موتی کے دانے میں
درُ دنداں ترا ہے واہ کس تنویر کا دانا
جو ہے بے ذوق کب ملتی ہے لذت دار شئے اُس کو
جلا گل ہے دہان بے حسِ گل گیر کا دانا
مزا کیا جب کہ دانے کے لئے کی آبرو ریزی
ہمیشہ مجھ کو دینا اے خدا توقیر کا دانا
حلاوت روح کو دل کو جگر کو جس سے ملتی ہے
ترا خالِ لبِ شیریں ہے کس تاثیر کا دانا
تصور اس قدر باندھا ہے نقشِ نامِ اقدس کا
کہ تل ہر آنکھ کا ہے نقطۂ شبیر کا دانا
کسی سے طالب ِ ناں کس لئے شیخِ ریائی ہو
اُسے کافی ہے اپنی سبحۂ تزویر کا دانا
دکھا کر خالِ ابرو جو چھری پھیری تھی گردن پر
نہ بھولا طائرِ دل وہ دمِ تکبیر کا دانا
ہوا سرمے کے تل سے رنگ ان گالوں میں کندن کا
نزاکت ہے سبب اس کا کہ ہے اکسیر کا دانا
مرے آنسو جو پوچھے یار نے دھانی دوپٹے سے
ہوا سر سبز آخر اشکِ بے تاثیر کا دانا
کبھی تدبیر سے غیر از مقدر مل نہیں سکتا
جو ہے تقدیر کا دانا وہ ہے تدبیر کا دانا
کتابت پیشہ کی روزی کی کیا موہوم ہوتی ہے
سوائے نقطہ کیا ہے خامہ تحریر کا دانا
لگایا منہ کہ چوموں خالِ لبِ پہلو سے اُٹھ بھاگے
چھِنا منہ سے دہان ِ آسیؔ دل گیر کا دانا
٭٭٭