غزل

جو پتھر آکے سر میں لگا لالہ گوں ہوا
ہر داغ گل فروشِ بہار ِ جنوں ہوا
توبہ سے بڑھ کے ذوقِ لبِ بادہ گوں ہوا
مینائے مے مرے لئے مینائے خوں ہوا
فرہاد! میری راہ طلب کی صعوبتیں
ایک ایک سنگ ریزہ یہاں بے ستوں ہوا
افسوسِ نقشِ سجدہ ترے آستانِ کا
میں کیوں نہ جبہۂ سرِ گردنِ دوں ہوا
میں اور زہر تلخی تقریر پند گو
اے دوست تو ہی دشمنِ صبر و سکوںہوا
رنگِ شفق سے نوک ِ مژہ کا مقابلہ
گویا کہ آسمان بھی دریائے خوں ہوا
بے قیدیاں بری تھیں تجھے لا مکان کی
کیوں زیر بارِ منتِ سقف وستوں ہوا
ناوک فگن کی چشمِ توجہ کہاں نصیب
سینے میں دل بھی حسرتِ صیدِ زبوں ہوا
بے شبہہ پائے بوس ترا فرضِ عین ہے
چرخِ بریں اسی کے لئے سرنگوں ہوا
وصل ایک حور کا نہ میسر ہو یا نصیب
گویا رقیب اُلفت دنیائے دوں ہوا
اُس نے جو دل کو پھونک دیا اس نے عرش کو
نالا حریفِ طاقت سوزِ دروں ہوا
ممنونِ خاک سجدہ ہوں اے وعدہ گاہِ دید
داغِ جبیں، خضر کی طرح رہ نموں ہوا
خالی ہو آپ سے تو ملے اذنِ خاک بوس
مجھ کو تو خضرِ رہ قدحِ واژگوں ہوا
لاکھوں ہی آرزوئیں تھیں جو ذبح ہو گئیں
صبحِ شبِ وصال بڑا کشت و خوں ہوا
میں اور وصفِ چشم سخن گو نہ کر سکوں
اللہ! معجزہ بھی ہلاک ِ فسوں ہوا
یوں دل سے گھر کر چھوڑے ہوئے بھاگے جاتے ہو
کیا ظلم تم پر اے مرے صبر و سکوں ہوا
ذلت اگر دلیل کمالاتِ عشق ہے
آسی سے بڑھ کے کون ذلیل و زبوں ہوا
٭٭٭