غزل
بدرقہ راہِ طلب میں نہیں ہمت کے سوا
راہبر کوئی نہیں جوشِ محبت کے سوا
اور کیا چاہتی ہے آرزوائے دل اُن سے
کچھ نہیں حُسن کی سرکار میں حسرت کے سوا
نظر و ناظر و منظور نہ جب ایک ہوئے
کیا ملا روزِ قیامت میں ندامت کے سوا
کچھ خبر کوچہ ٔ جاناں کی بھی ہے اے واعظ
عشق بازوں کی ہے جنت تری جنت کے سوا
تابعِ خواہش ِ محبوب ہو خواہش جس کی
رنج پاس اُس کے نہ آئے کبھی راحت کے سوا
حُسن صورت کے لئے خوبی سیرت ہے ضرور
گل وہی جس میں کہ خوشبو بھی ہو رنگت کے سوا
پوچھتے ہو شہِ جیلاں کے فضائل آسیؔ
ہر فضیلت کے وہ جامع ہیں نبوت کے سوا
٭٭٭
