غزل

دلِ شیدا ہے بیمارِ محمدؐ
اسیرِ زلف خم دار محمدؐ
جو داغ دل ہے چشم آرزو ہے
غصب ہے شوق دیدار محمدؐ
عزیز مصر دل کہتے ہیں اس کو
ہے یوسف بھی خریدار محمدؐ
اگر مردہ سنے زندہ ہو دم میں
دمِ عیسیٰ ہے گفتار محمدؐ
بچھا جاتا ہے دل قدموں کے نیچے
یہ ہے انداز رفتار محمدؐ
سدا جس کو بہارِ بے خزاں ہے
وہ ہیں گل ہائے رخسار محمدؐ
دم نزع آئے جان آنکھوں میں جس دم
خدا دکھلائے دیدارِ محمد
کھلے کب تک تپِ فرقت سے یارب
علیل چشم بیمار محمدؐ
مدینہ ہو مرا مدفن الٰہی
بسوں میں زیرِ دیوار محمدؐ
خریدارانِ یوسف کا ہے دل سرد
یہ ہے گرمی بازار محمدؐ
محمد ہیں خدا کے عاشق زار
خدا ہے عاشق زار محمدؐ
پھر آئے دم میں عرش کبریا سے
یہ ہے اعجاز رفتار محمدؐ
نہیں اپنے گناہوں کا مجھے غم
میں آسیؔ ہوں گنہگار محمدؐ
٭٭٭