غزل

نہ میرے دل ، نہ جگر پر، نہ دیدہ تر پر
کرم کر ے وہ نشانِ قدم تو پتھر پر
تمہار ے حسن کی تصویر کوئی کیا کھینچے
نظر ٹھہرتی نہیں عارض منور پر
کسی نے لی رہِ کعبہ کوئی گیا سوئے دیر
پڑے رہے ترے بندے مگر ترے در پر
گناہگارہوں میں واعظو تمہیں کیا فکر
مرا معاملہ چھوڑو شفیع محشر پر
ان ابروئوں سے کہو کشتی میں جان بھی ہے
اسی کے واسطے خنجر کھنچا ہے خنجر پر
پلا دے آج کہ مرتے ہیں رند اے ساقی
ضرور کیا کہ یہ جلسہ ہو حوضِ کوثر پر
صلاحیت بھی تو پیدا کر اے دلِ مضطر
پڑا ہے نقشِ کف پائے یار پتھر پر
وفورِ جو ش ضیاء اور ان کے دانتوں کا
حبابِ گنبد گردوں ہے آبِ گوہر پر
اخیر وقت ہے آسی چلو مدینے کو
نثار ہو کے مرو تربتِ پیمبر ؐ پر
٭٭٭