غزل

کیا تجھ سے طلب کرے یہ جاں سوز
بس ایک نگاہِ دو جہاں سوز
شعلہ بھی ہے کیا شبیہ مجھ سے
ظاہر، باطن، نہاں، عیاں سوز
وہ سوز تپ فراق پوچھیں
جا ناکہ یہ ذکر ہے زباں سوز
ساقی کی نگاہ مست تھی آہ
یا بادۂ تند استخواں سوز
کچھ سوز دروں کی انتہا ہے
اک آہِ ضعیف مغزِ جاں سوز
ہم اور خموش اے قیامت
گرمی جلوے کی ہے فغاں سوز
کس دشت میں عشق نے تھکایا
ہر ریگ رواں ہے کاررواں سوز
ہر داغ جگر ہے صورت گل
ہر آتشِ گل ہے گلستاں سوز
بلبل ہے کہ آسماں اندوہ ہے
نالہ ہے کہ برق آشیاں سوز
سر جوشِ شرابِ ناب غم تھا
یا آتشِ تند خانما سوز
خود شعلہ ہے سازِ سوزشعلہ
کیوں جوِ فغاں نہ ہو فغاں سوز
بے پردہ ہے عرش کا نظارہ
ہر شعلہ دل ہے آسماں سوز
اس خلوتِ راز کے طلسمات
جو راز کھلا وہ راز داں سوز
وہ جانِ نزارِ آسیؔ زار
وہ تاب گداز غم تواں سوز
٭٭٭