غزل

کیا میری کائنات کہاں جبّہ شریف

سر پر ہو میرے نور فشاں جُبّہ شریف
حیرت ہے اس کے ظاہر و باطن کے حال پر
پنہاں تو نورِ حق ہے عیاں جُبّہ شریف
گزرا جدھر سے نورِ فشاں ہو کر کے گیا
رستے کو رشکِ کاہکشاں جُبّہ شریف
عرشِ بریں کو کیوں نہ ہو رشکِ اس زمین پر
رونق فزا ہو آکے جہاں جُبّہ شریف
ہاں منکرو جو تم کو نہ سوجھے عجب نہیں
پردے میں نور کے ہے عیاں جُبّہ شریف
جنت دھری ہے اہلِ زیارت کے واسطے
ہے خضرِ راہ باغ جناں جُبّہ شریف
اے اہلِ ذوق لوٹ لو دیدار کے مزے
سوچو تو دل میں پھر یہ کہاں جُبّہ شریف
وہ کیا ہے جس میں بوئے نبیؐ ہو بسی ہوئی
مجھ سے جو پوچھو کہہ دوں کہ ہاں جُبّہ شریف
اس وقت زندگی مری آسیؔ اسی میں ہے
میں اور میری روحِ رواں جُبّہ شریف
٭٭٭