غزل
بلبل تو غش میں دیکھ کے بے پردہ روئے گل
گلبن سیاہ مست چڑھا کر سبوئے گل
بلبل بھی ہوتی آئینہ حسنِ روئے گل
کرتی جو رنگِ گل کی طرح جستجوئے گل
ڈالا شگاف غم نے دلِ عندلیب میں
لو کھل گیا درِ قفس آرزوئے گل
وسعت ہے ذوق ِ مستی بلبل کے واسطے
لبریز رنگ بادہ سے ہے چار سوئے گل
لڑوائو گے کبھی نہ کبھی عندلیب سے
گالوں میں رنگِ گل ہے تو بالوں میں بوئے گل
میں اور نالہ ہائے جگر دوزِ آسماں
چوگانِ آہ بلبل شیدا و گوئے گل
سمجھو ہمارے عشق کی حد اپنے حسن سے
آئینہ دار حیرت بلبل ہے روئے گل
بلبل کو حوصلہ چمن کوئے یار کا
کیا ہوش اس کے جاتے رہے روبروئے گل
بازار و کنجِ خلوتِ عصمت خدا کی شان
آخر شراب حسن نے توڑا وضوئے گل
پردہ اٹھا دے روئے حقیقت سے اے صبا
ہر گل ہو بلبل چمن رنگ و بوئے گل
بلبل کے عشق میں ہو اگر کیفِ معرفت
مینائے سرو میں ہے شرابِ سبوئے گل
اُ س کے سوا تو قابل الفت کو ئی نہیں
بلبل نے کر دیا مجھے مشتاق روئے گل
جز عشق کس میں قوتِ ادراک راز حسن
بلبل کے اشک غم سے بڑھی آبروئے گل
میں جانتا ہوں جذب محبت کے معجزے
اے عندلیب غنچہ منقار وبوئے گل
اس غیرتِ بہار نے عزم چمن کیا
آسیؔ نظر پڑے گی کسی کی بھی سوئے گل
٭٭٭