غزل
ظاہر میں تو ہیں مگر نہیں ہم
دریائے رواں نہ ہوں کہیں ہم
اے روئے سیاہ دیکھ مر کر
کالا نہ کریں دل ِزمیں ہم
دشمن سے بھی بوئے دوست آئی
کس سے رکھیں گے بغض و کیں ہم
پچھم تھے ہلال، بدر پورب
ہر سمت نظر پڑے ہمیں ہم
اس کا بھی تو اب پتا نہیں ہے
لائے تھے یہاں دل حزیں ہم
اللہ رے نورِ سجدہ شوق
مہ رو تم ہو تو مہ جبیں ہم
عاشق سے تو رنگِ رخ نہ سنبھلا
ان کو دعوائے کہ نازنیں ہم
کہتے ہیں کہ ہم کو کس نے ڈھونڈھا
جو ڈھونڈھے جہاں ملیں وہیں ہم
باتوں کی ہوس میں واعظو تم
جاں دادئہ لعل شکریں ہم
آباد کرو بھی خانہ ٔ دل!
اچھا نہیں تم کہیں، کہیں ہم
تم چھیڑو لحد میں اے فرشتو
ہیں بندہ شاہِ مرسلیں ہم
اپنی شیریں کلامیوں سے
لٹواتے ہیں قند و انبگیں ہم
بت خانہ و کعبہ کچھ نہ جانا
کیا جانیں خلافِ کفر و دیں ہم
ہو جو ش ِ بہار گل ہمیں کیا
دستار نہ جیب و آستیں ہم
آسیؔ بھی نہ کر سکیں گے انکار
باتیں کہتے ہیں دل نشیں ہم
٭٭٭