KaT hii gaii judaaii bhii kab yuu.N huaa ke mar gaye,
tere bhii din guzar gaye mere bhii din guzar gaye,

tuu bhii kuchh aur aur hai ham bhii kuchh aur aur hai.n,
jaane vo tuu kidhar gayaa jaane vo ham kidhar gaye,

raaho.n me.n hii mile the ham raahe.n nasiib ban gaii.n,
tuu bhii na apne ghar gayaa ham bhii na apne ghar gaye,

vo bhii Ghubaar-e-Khaak thaa ham bhii Ghubaar-e-Khaak the,
vo bhii kahii.n bikhar gayaa ham bhii kahii.n bikhar gaye,

koii kinaar-e-aab-e-juu baiThaa huaa hai sar_niguu.N,
kashti kidhar chalii gaii jaane kidhar bha.Nvar gaye,

tere liye chale the ham tere liye Thahar gaye,
tuu ne kahaa to jii uThe tuu ne kahaa to mar gaye,

vaqt hii kuchh judaa_ii kaa itanaa taviil ho gayaa,
dil me.n tere firaaq ke jitane the zaKhm bhar gaye,

baarish-e-vasl vo huii saaraa Ghubaar dhul gayaa,
vo bhii nikhar nikhar gayaa ham bhii nikhar nikhar gaye,

itne qariib ho gaye itne raqiib ho gaye,
vo bhii Adeem Dar gayaa ham bhii Adeem Dar gaye .