غزل
خواہشوں کی پتیاں بکھری ہیں کیا
صحن گل میں تتلیاں بکھری ہیں کیا
شہر جاں میں پوچھتا کوئی نہیں
بے بسی کی دھجیاں بکھری ہیں کیا
جھانکتے ہو کیا سمندر آنکھ میں
اس کے اندر سیپیاں بکھری ہیں کیا
اس کی یادیں آکے دروازے پہ پھر
آہٹوں کے درمیاں بکھری ہیں کیا
موسم تازہ کے بارے میں کہو
کچھ گلوں کی پتیاں بکھری ہیں کیا
پھنس گیا ہوں میں بھنور میں رات کی
ساحلوں پر کشتیاں بکھری ہیں کیا
چبھ رہا ہے کیا ہمارے پاؤں میں
سازشوں کی کرچیاں بکھری ہیں کیا
کیسا منظر دیکھتا ہوں دور تک
آنکھ میں رنگینیاں بکھری ہیں کیا
کب سے عادل ہے محاذ جنگ پر
گھر میں اس کے سسکیاں بکھری ہیں کیا
*****************
.JPG)
