* Apni talash mei’n hoo’n rawa’n kubaku honooz *
Apni talash mei’n hoo’n rawa’n kubaku honooz
Kis aahuye rameeda ki hai justaju honooz
Be chehragi ka koyee madawa na hosaka
Mai’n aayene ke samne hoo’n rubaroo honooz
Har shamma bad guman hai har raushni khafa
Tareekiyo’n ka raj hai har char su honooz
Khamoshiya’n hai’n apni mulaqat ka maal
Jaari hai yoo’n to silsela guftagu honooz
Khawabo’n ke malgaje me’n sare shame intazaar
Mahwe khawab chhat pe hai ek khoobru honooz
Shahro’n me’n ja ke saare chaman zadah chhup gaye
Raqsa’n hai bastiyo’n me magar rang –o-bu honooz
Parchhiyo’n ki qaid me’n hai aaj tak wojood
“Hali” khud apne aap me’n hayal hai tu honooz
|