* Fitanaa phir aaj uthaane ko hai sar lagtaa hai *
Fitanaa phir aaj uthaane ko hai sar lagtaa hai
Khuun hii Khuun mujhe rang-e-sahar lagtaa hai
maan luun kaise ki mai’n aib saraapaa huu’n faqat
mere ahabaab kaa ye husn-e-nazar lagtaa hai
kal jise phuunkaa thaa ye kah ke ki dushman ka hai ghar
sochtaa huu’n to vo aaj apnaa hii ghar lagtaa hai
ehatiyaatan koii dar phod lei’n diivaar mei’n ab
shor badhtaa huaa kuchh jaanib-e-dar lagtaa hai
ek darvaazaa hai har simt me.n khulne ke liye
ho’n na ho ye to mujhe sheKh kaa ghar lagtaa hai
|