ارشد مینا نگری
عید بھی دردِ دل چھپا نہ سکی
(بم دھماکوں کے تناظر میں)
مسکراہٹ بھی مسکرا نہ سکی
جگمگاہٹ بھی جگمگا نہ سکی
ہنستے ہنستے چھلک پڑے آنسو
عید بھی دردِ دل چھپا نہ سکی
یہ معطر فضا ، یہ گل ، کلیاں
یہ حسیں منظروں کی رنگ رلیاں
یہ مچلتی ، سجی سجی گلیاں
خوشنمائی بھی دل لبھا نہ سکی
عید بھی دردِ دل چھپا نہ سکی
دردِ دہشت سے دل تڑپتا ہے
رُت میں ساون کی دل بھڑکتا ہے
ہو کے بیتاب دل دھڑکتا ہے
اضطرابی ، سکون پا نہ سکی
عید بھی دردِ دل چھپا نہ سکی
اب بھی ارشدؔ عجیب ہے عالم
اب بھی بدلا نہ شعلہ زن موسم
اب بھی گلشن میں پھوٹتے ہیں بم
آگ بھڑکی ہوئی بجھا نہ سکی
عید بھی دردِ دل چھپا نہ سکی
*********************
