ارشد مینا نگری
عید کی جنّت
پریوں کی جیسی جا بجا رنگت سنور گئی
پھولوں کی عطریات کی خوشبو بکھر گئی
حوروں کی طرح چار سو دنیا نکھر گئی
عید آئی یا زمین پہ جنت اتر گئی
انجم ہیں نگاہوں میں تو ہونٹوں پہ تبسم
دھڑکن میں ہے سرور تو سانسوں میں ترنم
دل جھوم اٹھے ایسا ہے پرکیف تکلم
نیرنگ نظارے ہیں جدھر بھی نظر گئی
عید آئی یا زمین پہ جنت اتر گئی
کلیوں کی طرح لگتی ہیں خوش رنگ لڑکیاں
گلدستوں جیسی مہکے ہیں بچوں کی ٹولیاں
کانوں میں شہد گھولتی ہیں میٹھی بولیاں
نظروں میں کیا بہار کی رنگت ٹھہر گئی
عید آئی یا زمین پہ جنت اتر گئی
نظروں میں ہے خمار تو مسرور ہیں چہرے
خوش رنگ ہیں لباس تو پرنور ہیں چہرے
سب کے سرور و کیف سے معمور ہیں چہرے
مغموم زندگانی کی نوبت گذر گئی
عید آئی یا زمین پہ جنت اتر گئی
مطلوب ہر حسیں کو ہیں چاہت کی پناہیں
گلشن میں ہر اک گل کھلا ،کھولے ہوئے باہیں
یوں پڑتی جوانوں پہ حسینوں کی نگاہیں
جیسے کہ تتلیوں کی نظر پھول پر گئی
عید آئی یا زمین پہ جنت اتر گئی
احباب کیا رقیب بغل گیر ہو گئے
اندھیارے اضطراب کے تنویر ہو گئے
پھولوں کی طرح ، زہر بھرے تیر ہو گئے
ارشدؔ عناد و بغض کی ہر سوچ مر گئی
عید آئی یا زمین پہ جنت اتر گئی
+++
