* wo nahii.n mera magar usse mohabbat hai to hai *
GHAZAL
wo nahii.n mera magar usse mohabbat hai to hai
ye agar rasmo.n,riwajo.n se baghabat hai to hai
sach ko maine sach kaha, jab kah diya to kah diya
ab zamaane ki nazar mei.n ye himaaqat hai to hai
kab kaha maine ke wo mil jaaye mujhko ,mai.n usey
ghair na ho jaaye wo bas itni hasrat hai to hai
jal gaya parwana to sham'a ki ismei.n kya khata
raat bhar jalna jalana uski qismat hai to hai
dost ban kar dushmano.n sa wo satata hai mujhe
phir bhi us zalim pe marna apni phitrat hai to hai
duur the aur duur hai.n har dam zamiin-o-aasmaa.N
duuriyo.n ke baad bhi dono.n mei.n qurbat hai to hai
(DEEPTI MISHRA)
|