HijaaboN meN bhii tuu numaayaaN numaayaaN,
farozaaN farozaaN daraKhshaaN daraKhshaaN,
tere zulf-o-ruKh ka badal dhuuNdtaa huN,
shabistaaN shabistaaN charaaGhaaN charaaGhaaN,
Khat-o-khaal kii tere parchhaaiyaaN haiN,
KhayaabaaN KhayaabaaN gulistaaN gulistaaN,
junuun-e-muHabbat un aaNkhoN kii waHshat,
bayaabaaN bayaabaaN GhazalaaN GhazalaaN,
lapaT mushk-e-gesuu kii taataar taataar,
damak la’l-e-lab kii badakshaaN badakshaaN,
vahii ek tabassum chaman dar chaman hai,
vahii pankhurii hai gulistaaN gulistaaN,
saraasar hai tasviir jam’eetoN  kii,
muHabbat kii duniyaa harasaaN harasaaN,
yahii jazb-e-pinhaaN kii hai daad kaafii,
chale aao mujh tak gurezaaN gurezaaN,
“Firaq” khaziiN se tau waaqif the tum bhii,
vo kuch khoyaa khoyaa pariishaaN pariishaaN.