غزل

٭……رگھو پتی سہائے فراقؔ

حُسن بھی تھا اُداس اداس شام بھی تھی دھواں دھواں
یاد سی آکے رہ گئیں دل کو کئی کہانیاں
چھیڑ کے داستانِ غم اہلِ وطن کے درمیاں
ہم ابھی بیچ ہی میں تھے اور بدل گئی زباں
سرحدِ غیب تک تجھے صاف ملیں گے نقش پا
 پوچھ نہ یہ پھرا ہوں میں تیرے لئے کہاں کہاں 
رنگ جما کے اٹھ گئی کتنے تمدنوں کی بزم
یاد نہیں زمین کو بھول گیا ہے آسماں
جس کو بھی دیکھئے وہی بزم میں ہے غزل سرا
چھڑ گئی داستانِ دل بحدیث دیگراں
بیت گئے ہیں لاکھ جگ سوئے وطن چلے ہوئے
پہنچی ہے آدمی کی ذات چار قدم کشاں کشاںکشاں
جیسے کھلا ہوا گلاب چاند کے پاس لہلہائے
رات وہ دستِ ناز میں جامِ نشاط ارغواں 
مجھ کو فراق یاد ہے پیکرِ رنگ و بوئے دوست
پائوں سے تاجبینِ مہر فشاں و مہہ چکاں
****