* Ras me’n Duuba huaa laharaataa badan kyaa kahnaa *
Ras me’n Duuba huaa laharaataa badan kyaa kahnaa
karavate’n letii huii subah-e-chaman kyaa kahnaa
baagh-e-jannat me’n ghataa jaise baras ke khul jaaye
sondhii sondhii terii Khushbuu-e-badan kyaa kahnaa
jaise laharaaye koii sholaa kamar kii ye lachak
sar ba-sar aatish-e-sayyaal badan kyaa kahnaa
qaamat-e-naaz lachakatii huii ik qaus-o-e-qazaah
zulf-e-shab rang kaa chhayaa huaa jaha’n kyaa kahnaa
jis tarah jalvaa-e-firdaus havaao’n se chhiine
pairaahan me’n tere rangiinii-e-tan kyaa kahnaa
jalvaa-o-pardaa kaa ye rang dam-e-nazzaaraa
jis tarah adh-khule ghunghat men dulhan kyaa kahnaa
jagamagaahat ye jabiin kii hai ke pau phatatii hai
muskuraahat hai terii subah-e-chaman kyaa kahnaa
zulf-e-shabguun kii chamak paikar-e-siime’n kii damak
diip maalaa hai sar-e-gang-o-jaman kyaa kahnaa
|