Ye baateN jhuuTii baateN haiN, ye logoN ne phailaa’ii haiN,
tum Insha jii kaa naam na lo, kyaa Insha jii sauda’ii hain,
haiN laaKhoN rog zamane meN,kyuN ishq hai rusvaa bechaaraa,
haiN aur bhii vaj’heN vahshat kii, insaan ko rakhtii dukhiyaaraa,
haaN ! bekal-bekal rahtaa hai vo piit meN jisne dil haaraa,
par shaam se lekar sub’h talak yuuN kaun phire hai aavaaraa,
gar ishq kiyaa hai tab kyaa hai, kyuN shaad nahiN aabaad nahiiN,
jo jaan liye bin Tal na sake, ye aisii bhii uftaad nahiiN,
ye baat to tum bhii maanoge, vo Qais nahiiN Farhad nahiiN,
kyaa hijr ka daruu mushkil hai, kyaa vasl ke nusKhe yaad nahiiN,
jo humse kaho ham karte haiN, kyaa “Insha” ko samjhaanaa hai,
us laRkii se bhii kah leNge, go ab kuch aur zamaanaa hai,
yaa chhoReN yaa takmiil kareN, ye ishq hai yaa afsaana hai,
ye kaisaa gorak-dhandaa hai, ye kaisaa taanaa-baanaa hai,
ye baateN jhuuTii baateN haiN, ye logoN ne phailaa’ii haiN,
tum Insha jii kaa naam na lo, kyaa Insha jii sauda’ii haiN.