Ravish meN gardish E saiyyargaaN se achchhi hai
ZameeN kaheeN ki bhi ho aasmaaN se achchhi hai

Jo harf E haq ki himaayat meN ho woh gum-naami
Hazaar waz’a ke naam O nishaaN se achchhi hai

Ajab nahiN k usi ki zabaan kheeNchi jaaye
Jo kah raha hai khamoshi zabaaN se achchhi hai

Bas ek khauf kahiN dil yeh baat maan na jaaye
Yeh khaak E Ghair hameN aashiyaaN se achchhi hai

Hum aise gul-zadagaaN ko bahaar yek saa’at
Nigaar khaana E ahd E khazaaN se achchhi hai
***