’’ لاحول ولا قوۃ‘‘

زاہد، سر میخانہ، لا حول ولا قوۃ
یہ ہاتھ میں پیمانہ، لا حول ولا قوۃ
اخبار کی سرخی بھی کیا خوب نرالی ہے
بچہ جنے مردانہ،لا حول ولا قوۃ
کھاتے ہوئے گڈّو کو ٹوفی جو کبھی دیکھا
بیگم کا مچل جانا ،لا حول ولا قوۃ
موجود بھی سو فیصد ہو گھر میں اگر بیوی
پھر دایہ سے یارانہ،لا حول ولا قوۃ
دیکھی جو نئی جوتی پھر یاد مجھے آیا
بھولا ہوا افسانہ، لا حول ولا قوۃ
رہتی ہے انہیں خواہش کمسن ہی ابھی سمجھوں
ہر بات میں تتلانا ،لا حول ولا قوۃ
میں نے درِ جاناں پر جاناں کو صدا دی تھی
اور آئے نکل نانا، لاحول ولا قوۃ
سایا کی جگہ میری لنگی ہی پہنتی ہیں
اک دن نہیں روزانہ ،لا حول ولا قوۃ
امریکہ سے آتا ہے خیرات کا گیہوں جب
ملتا ہے ہمیں کھانا، لا حول ولا قوۃ
آدم کا ہے دشمن بھی آدم کی غذا بھی ہے
گیہوں کا یہی دانہ، لا حول ولا قوۃ
قوال کے شاعر ہو، میراثی کہ بھٹیارہ
پیشہ ہے غزل گانا،لا حول ولا قوۃ
اسکول کے بچوں پہ ہے بھوت محبت کا
یہ شمع و پروانہ ، لا حول ولا قوۃ
٭٭٭