GHAZAL :


Umr bhar pooja kia jis kaghzi tasvir kaa 
jaan us ne paai to fatva diya TAKFEER kaa 

shamma ki lao ko chhouo aor tum bhi seekho yeh sabaq 
aateshi hae pairahan har paikare tanveer kaa 

aashiqoN ki khodkushi ka be sabab charcha huaa 
roop thaa qatil kisi ki sohni tasveer kaa 

Aankh lagte hi takhayyol bhi badalta hae kahiN 
khwaab to hae ek bahaana shohrate taabeer ka 

apne kartootoN ke manzar ka bhi nazzara karo 
kab talak karte rahoge tum gila taqdeer kaa 
****