* madhosh tha najaane maiN keisi sehar meN tha *
Ghazal:
madhosh tha najaane maiN keisi sehar meN tha
haaN yaad hai ke hosh meN tere asar meN tha
chalta raha sambhal ke to rasta nahiN mila
bhatka jo raah se to teri raah-guzar meN tha
shauq-e-junooN tha dasht meN aaye the ham magar
waisa hi haal hai yahaN jaisa ke ghar meN tha
kuchh der ki thi din me bhi taaroN ki aarzu
jab tak mere naseeb ka suraj kohar meN thaa
qismat ko keya kahooN ke wohi de gayaa fareb
jis shakhs ke khloos ka charcha shaher me tha
Manzar ghame faraagh ko kaisi baqa meli
aab-e-hayaat keya isi jaame zahar meN thaa
****
|